KALIBO, Aklan—Patay eon kat masapwan it anang pamilya ro sangka 42-anyos nga eaeaki sa anang eugban sa sueod it andang baeay sa nalikod nga parte it Kalibo public market sa Brgy. Andagao, Kalibo, Aklan.
Nakilaea ro biktimang si Romel Grenio, sangka fish vendor, owa it asawa ag residente it nasambit nga lugar.
Suno kay Mrs. Amparo Grenio, ina it biktima nga nangawa imaw bangud nga matapos nga gin-aywan ro anang unga nga nagakatueog ag sa anang pagbalik halin sa ospital hay pareho man gihapon ro anang posisyon.
Ginpukaw sigon nana raya bandang alas-7:30 it agahon, apang owa eon nagahueag ag maeamig eon ro anang eawas.
Ginpahayag pa it anang ina nga pirmeng nagareklamo ro anang unga it pagpin-ot it anang dughan.
Makabig sigon nga alcoholic ro anang unga ag pilang beses eon man raya nga gindaea sa ospital.
Bangud kara, mabahoe ro andang pagpati nga owa it foul play ag natural death ro kabangdanan it kamatayon it anang unga daea it anang baeatian.
