KALIBO, Aklan—Kapin sa 42 nga mga miyembro it Ati community sa isla it Boracay ro nataw-an it theoretical driving course certificate agud nga makabuoe it libreng student license.
Suno kay Police Major Nathaniel Florendo it Highway Patrol Group (HPG)-Aklan nga ro programa hay ginpangunahan it Land Transportation Office (LTO)-Aklan sa pagdumaea ni Engr. Marlon Velez ag iba pang natungdan nga ahensya it gobyerno.
Tuyo sigon kara nga mataw-an it libreng student permit ro mga katutubong Ati sa isla para makaangkon it lisensya sa pagmaneho.
Mag-eowas kara, tuyo man nanda nga ma-edukar ro mga raya angot sa batas trapiko.
Ro nasambit nga mga benepisyaryo hay puro motorcycle riders.
Ro programa hay unang ginpatigayun ko Mayo 25 sa Ati Village sa Boracay kun siin nagtao sanda it theoretical driving course certificate.
Kahapon, Hunyo 1 ro pagproseso sa LTO-Caticlan it mga libreng student permit.
Ginpasiguro man ni Police Major Florendo nga pagatinguhaan nanda nga mataw-an it libreng non-professional ukon professional driver’s license ro mga nasambit nga indibidwal.
