KALIBO, Aklan–Nakataeana nga magboto ro 42 nga Persons Deprived of Liberty ukon PDLs sa Aklan sa May 9 national and local elections.
Suno kay Bureau of Jail Management and Penology ukon BJMP-Aklan Jail Warden Jail Inspector Rolyn Malolos nga kapareho sa absentee voting, ro mga nasambit nga PDLs hay pwede eamang nga magboto it national candidates, kaibahan ro presidente, bise presidente, mga senador ag party-list group.
Ro mga botanteng PDLs hay ginaeakipan it 36 halin sa male dorm ag 6 sa female dorm.
Apang, ginpaathag ni Jail Inspector Malolos nga masobra sa 50 ro naka-rehistro nanda nga botante rason nga ginpasugtan nga sa mismong sueod it andang pasilidad magapatigayon it pagboto ag ro mga tawuhan it Commission on Elections (Comelec) ro personal nga maga-agto idtu agud nga magpatigayon it eleksyon.
Ro mga taga banwa it Kalibo eamang nga botante ro ginpasugtan nga makaboto.
Samtang, ro mga PDLs suno kana nga makitaan it sintomas it COVID 19 sa adlaw it eleksyon hay paga-usisaon anay it nurse ag igapaidaeum sa antigen test agud nga matumod kon sanda hay makaboto.
Mag-eowas sa triage, may gintaeana man sanda nga area para sa mga katapo it media ag watchers nga maga-observe it andang eleksyon.
Ginpahayag dugang nga pwede man nga makaboto ro sangka PDL sa mismong polling precincts kara apang nagakinahangean raya it court order.
