KALIBO, Aklan—Kapin sa 429 Chinese nationals ro ginamonitor makaron it lokal nga gobyerno it Malay, Aklan nga una sa isla it Boracay bangud sa andang travel history halin sa China sa nagtaliwan nga 14 diyas.
Kaangot gihapon raya sa ginabantayang 2019 Novel Coronavirus Acute Respiratory Disease (NCoV ARD) nga gulpihang nagpabagsak sa turismo ag ekonomiya sa nasambitang isla ag sa bilog nga banwa.
Bangud kara, mas pang ginhugtan it ginbilog nga Inter-Agency Task Force Against 2019 Novel Coronavirus ro andang education and information campaign sa tanan nga sektor para makalikaw sa nasambitang sakit.
Samtang, uman nga gin-insister ni Malay acting Mayor Frolibar Bautista nga nagapabiling N-Cov free ro andang banwa ag ro bilog nga probinsya it Aklan rason nga uwa it dapat nga kahadlukan ro mga turista nga nagaplanong mag-adto sa Boracay.
Nasayuran nga mabahoe ro naging epekto it nCov scare sa isla kon sa siin, nagnaba ro tourist arrival sa mga nagtaliwan nga inadlaw nga nagtueod sa mga negosyanteng chinese nga magsarado eon lang it andang negosyo.
Nagapabilin ro travel ban sa mga nasyong China, Hong Kong ag Macau nga may kaso it nCoV.
