Kalibo Aklan ———–Nagapangatubang makaron sa kaosng pag-eabag sa RA 10591 ukon Comprehensive Firearms and Ammunitions ro sangka eaeaki matapos nga madakpan it mga baril ag bala sa sueod it anang baeay kaina it agahon sa Brgy. Camanci Sur, Numancia.
Raya hay pinaagi sa ginkasa nga operasyon it Numancia Municipal Police Station pinaagi sa gahum it search warrant nga ginpaguwa ni Hon. Judge Bienvinido P. Barrios nga may petsang October 7, 2021.
Nakilaea ro suspek nga si Joel Bernales , 43 anyos ag residente it nasambit nga lugar .
Narekober halin sa baeay it suspek ro sangka .45 kalibre nga baril nga may ap-at nga mga bala para kara ag sangka kalibre 38 revolver nga may limang bala, 14 nga live ammunition it 9mm, sangka magazine it 9mm ag sangka magazine it kalibre 45.
Samtang, depensa it suspek nga gin-prenda eamang kana ro nasambit nga mga baril it anang amigo nga nagpa-Manila may ap-at nga dag-on eon ro nagtaliwan .
Aminado man si Bernales nga owa it nagakaigo nga dokumento ro baril ag gintago eamang nana bilang proteksyon man sa anang kaugalingon .
Mabahoe man ro anang pagpati nga ro mga tawo nga may kahisa kana ro nagapakalhit it balita nga nagapinaeupok imaw it baril sa lugar.
Nasayuran nga trabaho nana makaron ro nagapangontrata it mga nagapa-obra it trusses ag grills .
Suno kana nga puro paeupok eamang ro anang ginagamit kada dag-on sa selebrasyon it anang kaadlawan ag bukon it baril.
Presenteng nakakulong ro suspek sa lock-up cell it Numancia PNP station.
Sa pihak nga parte, ginpamatud-an man ni Barangay Captain TK Villanueva ro pahayag ni Bernales nga nagagamit gid man raya it fireworks sa selebrasyon it anang kaadlawan kada dag-on.
Owa man sigon raya it ibang kaso nga ginapangatubang mag-eowas sa gina-demanda nga sustento para sa anang unga.
Bukon man sigon raya it eakot sa illegal nga droga.
Samtang, uman nga nagpanawagan si P/Lt. Rene Armenio, hepe it Numancia PNP sa mga nagahupot it baril nga owa it nagakaigo nga papeles nga ipa-deposito anay sa andang police station agud nga makalikaw sa problema.
