NATIONAL News — Ginpaabot it Commission on Elections (Comelec) nga nag-abot sa 43,033 aspirants para sa national ag local posts ro nagdihon it andang certificates of candidacy (COCs) ag certificates of nomination – certificates of acceptance of nomination (CON-CANs) sa tiempo it filing period umpisa Oktubre 1 hasta Oktubre 8.
Ginpahayag ni Comelec chairperson George Garcia nga 33,652 ukon 78.20 percent it mga aspirants sa 2025 midterm elections hay mga eaeaki samtang 9,381 ukon 21 percent hay mga babaye.
Suno kana nga 183 ro nag-file it COC para sa Senado nga mas mataas kumpara sa 153 nga nag-file ko 2019 midterm elections ag sa 176 nga aspirants sa 2022 polls.
May una man nga 190 ro nagdihon it CON-CAN nga ginsumite it mga party-list group.
Dugang pa ni Garcia nga sa 160 party-list groups nga nagdihon it andang manifestation of intent to participate, 155 ro nagsumite it andang CON-CANs.
Bangud kara, ginpahayag it Comelec nga makaangkon eamang it 155 Partylist nga igaeakip sa mga opisyal nga balota.
Dugang pa ni Garcia nga ro party-list organizations nga napas-eawan nga magsumite it CON-CANs hay ro SMILE, ACT AS ONE, KASAMA, MARINO ag STL.
Sa 2022 elections, 270 nga grupo ro nagdihon it andang CON-CAN.
Samtang, ginpahayag ni Garcia nga ro pinal nga numero it tanan nga mga national ag local candidates hay masayuran sa Disyembre.
Mag-eowas sa mga napabalita nga insidente it pagpamaril sa Sharif Aguak, Maguindanao ag pag-agaw it COC sa probinsiya it Negros Occidental, ginpahayag ni Garcia nga sa pangkabilugan hay matawhay ro tiempo it COC filing.
Suno kana nga ro insidente sa Mindanao hay nagresulta sa pagkanina it pilang mga tawo nga nagtueod kana nga imandu ro pagtukod it sangka satellite registration site sa guwa it probinsiya para sa COC filing it mga lokal nga kandidato.
