KALIBO, Aklan — Kulong ag nagapangatubang sa kasong pag-eabag sa Republic Act 10591 ukon Comprehensive Firearm and Ammunitions Regulations Act ro sangka 46-anyos nga eaeaki matapos nga makumpiskahan it mga baril, bala ag granada sa ginkasa nga operasyon sa sueod it anang baeay sa Sitio Pandan, Brgy. Bay-ang, Batan.
Ginsalakay it mga tawuhan it Provincial Intelligence Branch, Batan Police Station ag CIDG-Aklan ro baeay it suspek nga si Tito Legaspi, residente it nasambit nga lugar.
Armado ro mga otoridad it search warrant nga gin-isyu ni Judge Bienvenido P. Barrios it Aklan Regional Trial Court nga may petsang Hulyo 11, 2019.
Sa paghaeughog sa baeay it suspek, nadiskubre it mga operatiba ro sangka .45 kalibre nga baril, home made 12 gauge shotgun break type pistolized, sambilog pang owa nadetermina nga klase it armas, 2 ka bala it shotgun ag sangka granada.
Madumduman nga si Legaspi ro ginaturo nga nagbaril-patay sa 55-anyos nga si Ludie Ramintas ko Marso 5, 2019 samtang nga nagabo-oe it taeaba suba nga sakop it Brgy. Pinamuk-an, New Washington.
