BALITANG Espesyal — Naging sueod it mga news headline sa Japan kan-o eamang ro angot sa banwa it Abu kat magkasaea sanda nga ipadaea ro ayudang 46.3 million yen sa sangka tawo eamang!
Ro Abu hay makit-an sa Yamaguchi Prefecture. Raya hay sangka maisot nga banwa nga may 463 households.
Bangud sa COVID-19, ro kada household hay ginataw-an it andang gobyerno it 100,000 yen nga ayuda.
Apang 462 sa nasambit nga mga household hay owa nabaton ro andang ayuda bangud nga napadaea ro tanan nga kwarta sa sangka household .
Suno sa town officials it Abu, sambilog sa andang staff member hay may nahimo nga technical error sa system samtang gina proseso ro bank transfer nga naging rason agud nga maagto ro 46.3 million yen sa sangka household.
Kat ginhana nga ipabalik it mga awtoridad ro kwarta halin sa household nga nakabaton it 46.3 million yen, nagpamalibad raya nga ibalik ro kwarta bangud nga nagastos eon nana raya tanan .
Dugang pa kara nga owa imaw it plano nga magpanago sa mga awtoridad ag haum imaw nga sabton ro anang kasae-anan .
Bangud kara, nagpaguwa it public apology ro mayor it Abu nga si Norihiko Hanada ag nagpadaea it uman it ayuda nga 100,000 yen sa kada household pati man sa nakabaton it 46.3 million yen.
Sa makaron hay nakikipag angot ro mga awtoridad it Abu sa mga pulis ag abogado agud nga tun-an kon ano ro igakaso ag igapapanaog nga penalidad sa nagwaldas it 46 million yen nga ayuda.
