Kapin sa 46 nga mga dumueoong ro naeowas it mga pinoy seafarers matapos nga nasamaran ro mga raya it baroto ag nagpaeotaw-eotaw sa Mediterreanian Sea.
Suno kay Ship Captain Jesus “Kadil” Teodosio, tubong banwa it Balete nga nakabaton sanda it tawag maghalin sa Maritime Rescue Coordinating Center sa Rome, Italy samtang nagapaadto sanda it Valencia, Spain halin sa nasyon Egypt nga may distressed boat ag nagakinahang-ean it bulig.
May kaangtanan kara, insigida nana nga ginpueong ro anang mga tawuhan kon siin maskin sambilog kanda hay uwa gid nagpamalibad nga magtanyag it bulig sa pihak nga iba ro lahi it mga raya ag may ginakabaeak-an pa nga monkeypox virus.
Gilayon sanda nga nagplano it rescue operation ag dikato nasalbar ro mga dumueoong nga ro siyam kanda hay kon naagahan pa sa eawod hay posibleng binawian it hueam nga kinabuhi bangud sa gutom ag dehydration.
Base sa andang pag-imbestiga, ro mga Bangladeshi nationals hay nag apply it trabaho sa Libya agud nga matustusan ro andang kinahang-eanon sa pang adlaw-adlaw bangud sa kalisod it pagpangabuhi sa Bangladesh.
Apang, ginmaltrato sigon sanda idto ag ginakastigo rason nga nag desisyon nga magpaeagyo eon lang gamit ro andang binakae nga baroto halin man sa andang tinipunan nga sangkiri nga sweldo.
Nagdueotdutan ro mga raya sa baroto kon siin pag-abot sa katung-anan hay nasamaran sanda ag naubusan it gasolina.
Pagkarescue it mga pinoy sa mga workers hay naghinyo ro mga raya nga inde eon sanda pag-ibalik sa Libya bangud nga delikado ro andang kabuhi rason nga ginderetso sanda sa Sicily, Italy ag idto ginturn-over sa natungdan nga ahensya para makabulig kanda.
