KALIBO, Aklan—Nagreklamo sa Kalibo PNP ro sangka eaeaki matapos nga gin-eapog it bangko ag ginhana pa nga eagson it siyaw it ana mismo nga boardmate sa Magdalena Village, Brgy. New Buswang, Kalibo.
Ginkilaea ro tagreklamong si Ramonito Meroy, 48-anyos, tumandok it Brgy. San Isidro, Ibajay samtang ro ginaturo nga suspek hay ginkilaeang si Jupiter Fernandez, 46-anyos, tumandok it banwa it Balete apang parehong naga-board sa nasambit nga lugar.
Base sa report, naga-inuman ro biktima kaibahan ro iba pa kon sa siin ginsita sigon sanda it suspek bangud nga nasangagan raya.
Makataliwan ro pilang minuto hay gin-eapog sigon it bangko ni Fernandez si Meroy ag uwa pa nakuntento hay gin-eagas pa nana raya it siyaw.
Bangud kara, insigidang nagpadueong sa taeatapan it pulisya si Meroy agud nga ireklamo si Fernandez.
Samtang, ro kaso hay ginrefer sa barangay justice para sa nagakaigong disposisyon.
