KALIBO, Aklan—Nagapangatubang sa kasong homicide ro sangka 60 anyos nga tiyo matapos nga maeabu patay ro anang gumankon matapos nga makaangkon it mainitan nga diskusyon sa katung-anan it andang pag-inuman pasado alas-6 kabi-i sa Sitio Soebod, Barangay Mabilo, New Washington.
Dead-on-arrival sa Aklan Provincial Hospital si Joseph Masinda alyas “Moroy”, 48 anyos, ag residente it nasambit nga lugar.
Naaresto man it rumespondeng kapulisan si Armando Masinda alyas “Puti”, ag residente man it nasambit nga lugar ag tiyo it biktima.
Suno kay Police Corporal Eduardo Almirante it New Washington Municipal Police Station, parehong hilong ro daywa kat makaangkon sanda it mainitang diskusyon sa baeay mismo it suspek.
Samtang, aminado si Armando sa krimen nga anang nahimo.
Nairita ag nasangagan sigon imaw sa matsa pagiging samad nga plaka it anang gumankon, kun sa siin, pabalik-balik kara nga ginasaysay ro anang mga problema sa kabuhi ag pamilya rason nga ginsita ag ginpahipos nana raya.
Bangud kara, naakig si joseph ag ginbayo ro anang tiyo sa anang kilid.
Insigida raya nga nagbaeos ag nagbo-oe it sanduko ag makapilang beses nga gin-eabo ro anang gumankon nga tinamaan sa anang ueo ag nagkaeain-eain nga parte it eawas nga naging rason it anang kamatayon.
Ginpahayag dugang nga bukon eamang it raya ro unang beses nga ginbayo imaw it anang gumankon.
Plano man kara nga magpangayo it bulig sa anag pamilya agud nga makatipon it pangpiyansa.
