KALIBO, Aklan — Presenteng gina-imbestigahan it Balete Police Station ro sangka 13-anyos nga binatilyo matapos nga gina-alegar nga gin-abusuhan sekswal ro 5-anyos nga kaeapitbaeay pasado alas-4:00 it hapon, adlaw it Huwebes sa Barangay Feliciano sa banwa it Balete.
Boluntaryong gin-surrender it anang mga ginikanan ro menor de edad makaron nga agahon sa anang pag-uli sa andang baeay nga gintago sa pangaean nga “James” ag gindaea sa police station.
Ginasugid nga owa nag-uli sa andang baeay kabi-i si alyas James rason nga owa nakita it mga rumespondeng kapulisan.
Base sa report, samtang nagahampang ro biktima nga gintago sa pangaean nga “Nadine” ag nagakatueog ro anang ama sa sueod it andang baeay, ginasugid nga ginsampit ag gindaea sa likod it mabahoe nga puno sa magamo nga lugar ro menor de edad it biktima maeapit sa nasambit nga baeay.
Ginpahayag dugang nga nakahiligan eon it binatilyo nga magtan-aw it mga pornographic materials.
Nasayuran nga naga-agto kon amat ro biktima sa baeay it binatilyo bangud nga kahampang kara ro anang igmanghud nga babaye.
Todo man ro pagpamalibad it binatilyo nga gin-himuslan nana ro biktima.
Samtang, suno sa ama it binatilyo nga nag-istorya eon sanda it ina it biktima kahapon, apang nakibot eamang sanda kat nag-report raya sa kapulisan.
Ginpahayag man it ina it biktima nga matapos nga mag-uli halin sa trabaho, insigidang nagsugid kana ro anang unga nga masakit ro anang kinatawo matapos nga ginhimuslan imaw ag gin-obrahan it kabastusan ni alyas James.
Nakataeanang igapaidaeum sa medico legal examination ro biktima agud nga matumod kon nahimuslan raya.
