Kalibo Aklan —-Nagapaidaeum makaron sa mandatory home quarantine ro lima nga medical emergency responders it lokal nga gobyerno it Kalibo bangud sa 2019 coronavirus disease (COVID-19)
Raya hay matapos makasalamuha nanda ro sangka 51 anyos nga cancer patient nga nakabiyahe sa Metro Manila matapos nga magpabueong sa Lung Center of the Philippines nga sambilog man sa mga ospital nga ginadaehan it mga pasyente nga nagpositibo sa COVID-19.
Suno kay Civil Defense Officer Terence June Toriano nga gintago it pamilya it pasyente sa mga nagresponde nga miyembro it Municipal Disaster Risk Reduction and Management Office ukon MDRRMO-Kalibo ro andang travel history.
Nagsugid eamang sigon ro pamilya it pasyente kat gin-usisa sanda it doctor sa Aklan Provincial Hospital, kun sa siin andang ginhambae nga bag-o eamang sanda nga nakabalik halin sa Manila ag ginakabig sanda nga Persons Under Monitoring (PUM’s).
Ginpahayag dugang nga ro lima nanda nga kaibahan hay nag-sign up bilang person under monitoring sa Municipal Health Office it Kalibo.
Maskin nga owa it flu like symptoms , magapatigayon sanda it home quarantine hasta nga mataw-an it clearance nga eowas eon nga makabalik sa trabaho .
Sa makaron hay nagapabilin nga COVID free ro Aklan , apang may 9 nga nailistang Persons Under Investigation (PUI) ag 2,347 nga Persons Under Monitoring (PUM).
