KALIBO, Aklan — Naeowas sa pagka-eumos ro lima nga dayo nga mag-igkampod nga nag-excursion eamang sa sangka beach resort sa Brgy. Napti, Batan.
Base sa report, natabu ro insidente, agahon it Miyerkules, Enero 1, 2025 sa nasambit nga lugar.
Nagsaeampitan sigon ro mga raya nga halin sa Napti hay eanguyon ro tabok nga portion paagto sa Mandong Bridge.
Posible sigon nga owa napan-uhan it mag-igkampod nga ginaeakipan it sangka 24 anyos, 20-anyos ag tatlo nga menor de edad nga puro mga residente it Brgy. Mambusao, Capiz nga naagto eon sanda sa madaeum nga parte it dagat, kun sa siin kantilado ro lugar ag natiempo pa nga nagapataob ukon high tide.
Sa bulig it pilang mga mangingisda nga nakapan-o sa pagpangayo it tabang it mga biktima hay nabuligan ro mga raya.
Nasayuran nga nag-agto sanda sa nasambit nga resort kaibahan ro iba pa nanda nga miyembro it pamilya para magpaligos sa dagat.
Matapos mataw-an it first aid it mga rumespondeng tawuhan it Municipal Disaster Risk Reduction and Management Office (MDRRMO)-Batan hay gindaea ro mga raya sa Altavas District Hospital ag una eon makaron sa mayad nga kondisyon mag-eowas sa sambilog nga padayun nga naka-confine sa nasambit nga ospital.
