KALIBO, Aklan — Ninahan ro limang katawo kaibahan ro tatlong turistang Korean national matapos nga banggaon it motorsiklo ro andang ginasakyang tricycle bandang alas-4:45 it kaaganhon sa kahabaon it Jaime Cardinal Sin Avenue, Brgy. Pook, Kalibo, Aklan.
Ginkilaea ro mga biktima nga sanday Gyuri Kim, 50, Mi Hyang, 51, Hyebin Yun, 51, parehong mga Korean national; ag ro andang tour guide nga si Mark Anthony Francisco.
Kaeakip man sa naninahan ro driver it tricycle nga si Junifer Imperial ag ro motorcycle rider nga si Iris Christian Villaruel, 19, residente it Brgy. New Buswang, Kalibo, nga uwa sigon it lisensiya ag una sa idaeom it impluwensya it aeak samtang nagamaneho.
Suno sa mga nakasaksi, over speeding sigon ro motorsiklo rason nga sinungay kara ro ginasundang tricycle nga ginasakyan it mga turista samtang pabalik it Kalibo International Airport matapos nga ginkansela ro biyahe it mga motorbanca paadto it isla it Boracay.
Bangud kara, naninahan ro mga biktima nga insigidang gindaea sa pribadong ospital pati eon ro driver it motorsiklo ag tricycle nga gindaea sa Aklan Provincial Hospital.
Nasayuran nga magabakasyon kunta sa Boracay ro mga Koreano, apang bangud sa kanselasyon it biyahe it motorbanca tuga it bagyong Tisoy hay gin-abisuhan ro mga raya nga mag-check-in sa sangka hotel sa sueod it bisinidad it Kalibo International Airport.
