KALIBO, Aklan—Gina-imbestigahan eon it National Police Commission ukon Napolcom Region 6 ro limang pulis may kaangtanan sa gina-alegar nga pagkadaeahig sa hazing ag pagbakoe sa bagitong pulis matapos nga gin-assign raya sa Provincial Mobile Unit sa banwa it Buruanga.
Ginkilaea ni Atty. Joseph Celis, Director it NAPOLCOM Region 6 ro mga gina akusahan nga sanday P/Corporal Roque lurca, P/Corporal Richie lustica, Patrolman Ruel Cuales, Patrolman Ritchel Tolentino ag Patrolman Christian Solanoy.
Sanda ro ginaturo nga nagbugbog sa tagreklamo nga si Patrolman Romel Magsusi nga personal nga nagdangop sa Napolcom.
Suno kay Atty. Celis nga makabig nga pag-eabag sa anti-hazing law ro andang gin-obra nga pag-welcome sa andang kaparehong pulis maskin pa suno kana nga raya hay makabig nga tradisyon ukon common practice kon may nagasueod nga bag-ong miyembro sa andang unit.
Gindugang pa ni Atty. Celis nga ro limang pulis hay temporaryong ginsaylo sa Public Safety Company sa banwa it Libacao agud nga indi maimpluwensiyahan ro ginapatigayon nga imbestigasyon.
Ginahueat sigon nanda ro igasumite nga report ag kon may baeasihan, magpatigayon sanda it pre-charge investigation ukon preliminary examination kamana man evaluation it tagreklamo agud nga matumod kon may una nga probable cause.
Samtang, nagpahayag man it pagkadismaya si Atty. Celis sa mga pulis nga eakot sa hazing nga mag-eowas sa physical torture hay nagatuga man it mental torture.
