KALIBO, Aklan—Napasakaan eon it kaso pinaagi sa regular filing ro lima sa an-um nga turistang nagpakita sigon it pekeng swab test results it COVID-19 agud nga makasueod sa isla it Boracay.
Suno kay P/Major Jonathan Pablito, hepe it Malay Police Station, kasong pageabag sa falsification by private individual and use of falsified documents ukon Art. 172 it Revised Penal Code ro ginpasaka sa mga akusadong sanday Geraldine Tabious Yangson, Anna Karenina, Aldrin Cruz, Jeffrey Ortaliza ag Margarita Amparado, puro mga taga-Metro Manila.
Owa eon sigon gin-eakip sa kaso it prosecutor ro sambilog bangud nga genuine ro anang swab test result.
Samtang naka-quarantine sa Aklan Training Center sa Barangay Old Buswang, Kalibo hay ginpaidaeum ro mga raya sa swab tests ag sa mayad nga swerte hay naging negatibo sanda sa COVID-19 rason nga owa eon nadugangan ro andang kaso.
Nauna kara, ginkumpirma it sangka diagnostic center sa Mandaluyong City nga sambilog eamang sa an-um nga RT-PCR test results nga ginpa-usisa kanda ro authentic samtang ro ibang test results hay mga photocopies ag gin-retoke eamang.
Ro an-um nga turista hay nakabalik eon sa metro manila matapos nga temporaryong ginpahilway.
