Gindeklara it Commission on Elections (Comelec) ro limang nagdaog nga parliamentary district representatives sa siyam nga distrito it Lanao del Sur matapos ro makasaysayang Bangsamoro parliamentary elections.
Suno kay Atty. Mohammad Nabil Mutia, provincial election supervisor it Comelec ag chairman it Provincial Board of Canvassers, kaibahan sa mga gindeklarang nagdaog sanday Hamza Gauraki it UBJP para sa 2nd District, Lampa I. Pandi it UBJP para sa 4th District, ag Hosni Macapodi it SIAP para sa 6th District.
Proklamado man sanday Rayyan Mindalano it SIAP para sa 7th District ag Ahmad Amir “Arrie” Balindong it UBJP para sa 8th District.
Ginpahayag ni Mutia, uman nga magapueong it alas-10 it agahon ro Provincial Board of Canvassers para iproklama ro ap-at pang nagdaog nga district representatives.
Samtang, gindayaw ni Brig. Gen. Jessie Montoya, commander it 103rd Infantry “Haribon” Brigade, ro pakikipagbueuligan it Armed Forces of the Philippines, Philippine National Police ag mga lokal nga gobyerno agud nga masiguro ro malinong nga pagpatigayon it eleksyon sa probinsiya.
