KALIBO, Aklan—Nagapangatubang sa kasong falsification of documents ag Bayanihan to Heal as One Act ro limang turista ag sambilog pang kasabwat kara nga nagpameke it andang Reverse Transcription-Polymerase Chain Reaction (RT-PCR) tests result agud makabakasyon sa isla it Boracay.
Suno kay P/Lt. Col. Jonathan Pablito, hepe it Malay Police Station nga gin-aresto sa sangka hotel sa isla ro mga turista nga ginakaeakipan it ap-at nga babaye ag daywang eaeaki nga parehong maghalin sa Metro Manila.
Gindaea ro mga raya sa quarantine facility ag nakataeanang igapaidaeum sa swab tests.
Nagpadueong sigon ro mga raya ko Disyembre 5 ag 6 sa isla, ag gilayon man nga gin-usoy it mga otoridad matapos makabatun ro validation team it email maghalin sa sangka concerned citizen nga peke ro gingamit karang mga dokumento.
Nagguwa man sa imbestigasyon nga sambilg eamang kanda ro may orihinal nga RT-PCR test result samtang peke ro buyot it lima gamit ro code it ibang tawo.
Ginpahayag pa ni Lt. Col. Pablito nga umpisa kat ginbuksan ro isla sa domestic tourists, raya eun ro unang kahigayunan nga may mga turistang naghimo it pekeng dokumento.
