KALIBO, Aklan—Matapos ro pagkansela sa chartered flights pasueod ag paguwa sa maabu nga siyudad sa China, haeos 50 porsyento it international operation sa Kalibo International Airport ro naduea.
Suno kay Civil Aviation Authority of the Philippines ukon CAAP-Aklan manager Engr. Eusebio Monserate Jr. nga sunod-sunod eon ro andang nabaton nga notice of suspension halin sa mga airline companies nga may direct flight sa China nga magiging epektibo hin-aga nga adlaw, Pebrero 1 .
Raya hay ginaeakipan it Cebu Pacific, Philippine Airlines, Pan Pacific ag Royal Air.
Ginpamilit ni Engr. Monserate nga masobra sa 20 nga mga international flights ro nabawas sa andang adlaw-adlaw nga operasyon.
Ro Kalibo International Airport hay may 30 international flights kada adlaw nga kaabuan hay nagahalin sa Wuhan, Shendou ag Nanjing sa China.
May direct flight man raya sa Korea ag Taiwan.
Nauna kara, nagpatigayon it online petition ro mga negosyante ag residente sa Boracay nga nagapanawagan kay Pangueong Rodrigo Duterte ag mga natungdan nga ahensiya it gobyerno nga magpatuman it ban sa tanan nga mga flights pasueod ag paguwa it China maskin sa sueod it 30 diyas eamang.
Makabig sigon nga paeag sa andang kabuhi ro novel corona virus.
Ro Chinese tourists ro nagapanguna sa foreign visitors sa isla it Boracay.
