Haeos 500,000 household beneficiaries it Pantawid Pamilyang Pilipino Program (4Ps) ro ginaeauman nga magatapos eon sa programa antes matapos ro 2024.
Raya ro ginpahayag ni 4Ps Social Marketing Division Chief (DC) Marie Grace Ponce matapos napamatud-an nga naging self-sufficient eon ro mga benepisyaryo makaron.
Suno kana, may ikasarang eon ro nasambit nga mga benepisyaryo nga mapun-an ro tanan nandang mga kinahang-eanon, makaangkon man it krisis hay may una eon sandang maboe-an ag inde eon sanda malisdan nga mapun-an ro kinahang-eanon it andang mga onga sa pag-eskwela ag maging sa ikamayad nga eawas.
Ginpaathag kara nga base sa Republic Act (RA) 11310 ukon 4Ps Act, ro programa hay nagatao it conditional cash transfer sa mga kubos sa sueod it pitong dag-on.
Mag-eowas sa seven-year limit ag pagiging self-sufficiency level, nakabaehag sa Rule XV Section 35 it Implementing Rules and Regulations (IRR) it 4Ps Law ro mga rason para sa probisyon nga nakabaehag nga pwedeng mag-graduate ro sangka benepisyaryo.
