KALIBO, Aklan—Plano nga magpasaka it kasong rape ro sangka 51-anyos nga ginang matapos nga gina-alegar nga gin-abusuhan-sekswal it kainuman it barkada it andang baeapitbaeay sa sangka birthday party.
Sa interview it Bombo Radyo, ginpahayag it biktima nga gintago sa pangaean nga “weng” nga bangud sa grabeng kahilungon hay nalipong imaw sa payag ag ginpanipuslan it suspek nga nakilaea kay siwan ro kahigayunan ag imaw hay ginhimuslan.
Owa eon sigon imaw nabuligan it anang asawa nga una man sa inuman matapos nga nag-uli raya it temprano tugasa it kahilungon.
Owa sigon imaw nakasayod sa gin-obra it suspek ag pagkabugtaw sa andang baeay hay owa eon ro anang pang-ubos nga suksok.
Samtang, ginapatihan pa it biktima nga gintago it tagbaeay ro anang shorts ag underwear nga anang gin-usoy pagka-aga rason nga owa it ebidensiya kontra kay Siwan.
Natabu sigon ro insidente ko Agosto 25, 2020, apang bangud nga nag-eanog ro balita bukon eamang sa andang barangay kundi sa mga kaiping nga barangay hay nagdesisyon imaw nga magreklamo.
Gusto sigon nanda nga matur-an it leksyon ro suspek nga ginaturo nga responsabli sa pagpakalhit it balita eabi eon kon imaw hay mahilong.
Gindugang pa kara nga owa eagi imaw naka reklamo pagka-aga sa pagkabaeaka nga masayuran it anang mister.
Ro kaso hay gindangop man nanda sa andang barangay.
