KALIBO, Aklan—Sangka eaeaki nga dati eon nga nagsurender bangud sa iligal nga droga ro gin-aresto matapos nga mabak-ean it shabu it sangka undercover agent it gintingob nga pwersa it Philippine Drug Enforcement Agency ukon PDEA-Aklan ag Numancia Municipal Police Station.
Ginkilaea ro naaresto nga si Grace Rembulat, 52 anyos , may asawa ag residente it Brgy. Pusiw, Numancia.
Natigayon imaw nga madakpan sa Brgy. Camanci Norte Numancia, pasado alas-7 kaina it agahon bangud sa tatlong sachet it ginadudahan nga shabu nga nabakae kana sa ginpatigayon nga buy-bust operation it mga otoridad.
Suno kay Camanci Norte punong barangay John Maribojo nga dati eon nga nagsurender si Rembulat ag uman nga nagbalik sa pagduso it droga sa nasambit nga lugar.
Nabo-oe man sa anang posesyon ag kontrol ro 2,500 pesos nga gingamit nga marked money.
Gin-impound man ro anang ginsakyan nga motorsiklo nga sangka skeleton type.
Sa makaron hay presente raya nga nakapresu sa lock-up cell it Numancia PNP ag magapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002.
Angot kara, gindugang pa ni punong barangay Maribojo nga sigidas ro andang monitoring sa mga drug pusher ag user sa andang barangay sa bulig it andang Barangay Anti-Drug Abuse Council ukon BADAC.
Ginhinyu man kara ro kooperasyon ag bulig it andang mga residente agud nga eubusan eon nga maangkon ro ginahandum nga drug cleared status.
