KALIBO, Aklan—Ginkumpirma ni Punong barangay Niel Tumbukon it Calangcang, Makato nga namatay sa sakit nga diabetes ro sangka 54-anyos nga babayeng residente it andang barangay ko adlaw it Lunes, Mayo 10.
Ginpahayag nga nakaangkon it pilang ka mga sintomas it Coronavirus Disease 2019 ukon COVID-19 ro nasambit nga persona kapareho it pagsuka, pag-angkon it eagnat ag pagpandiho it basa.
Makataliwan ro sang adlaw hay nagpakita man it kaparehong sintomas ro 68-anyos nga magueang kara nga babaye kun siin sa anang pagpa-check up sa banwa it Kalibo ko Mayo 11 hay natukiban nga positibo raya sa Rapid test.
Bangud kara, insigida sigon nga ginsaylo sa COVID ward it Aklan Provincial Hospital ro pasyente bangud raya hay symptomatic.
Ginklaro man ni kapitan nga indi pa matumod kun positibo sa deadly virus ro namatay nga biktima bangud insigida rayang gin-imbalsamo.
Naka-istorya eon man sigon sanda it pamilya kun siin gindaea eon lang ro bangkay sa siyudad it Iloilo para i-cremate.
Sa ginpatigayun nga contact tracing, nakalista sanda it kapin sa 22 ka mga high risk contact it pasyente nga nakataeana nga ipaidaeom sa swab test makaron nga adlaw.
Samtang, ginpaidaeom man sa home quarantine ro 15 ka mga panimaeay sa lugar kaibahan ro immediate family.
