KALIBO, Aklan–Nakaangkon it settlement rason nga umatras eon sa pagpasaka it kaso ro 55-anyos nga eaeaki nga gin-eampusan it tubo it anang kasimaryo sa Brgy. Ochando, New Washington, hapon it Biyernes.
Suno kay PSSgt. Mar Louie Abelar it New Washington PNP station nga nagpirma ro kampo it biktimang si Johnny Armenio, 55 anyos nga indi eon magpasaka it kaso kontra sa 66 anyos nga suspek nga si Jose Romulo rason nga naangkon kara ro kahilwayan.
Gin-aresto si Romulo matapos kara nga bunaean it tubo si Armenio nga nag angkon it lastro sa anang ueo ag abaga.
Sa pihak nga parte, ginsaysay it suspek nga natabu ro insidente pasado ala-1:00 kahapon it hapon kat ginbaeabagan imaw it biktima nga gina alegar nga may pas-an nga wasay samtang sakay it anang motorsiklo.
Nakataeana kunta kara nga ihatud ro anang 16-anyos nga apong babaye sa eskwelahan.
Apang, gin-aywan nana raya sa lugar ag nagdaeagan kat ginhana imaw nga eampusan it wasay agud nga makalikaw sa disgrasya.
Sa anang pagbalik, nakita ni romulo nga gina-einapog it bato ro anang apo samtang nga nagadinaeagan.
Kat makita man sigon imaw it biktima hay ginhana man imaw nga habyon it bato rason nga bilang self-defense hay gin-eampusan eagi nana raya it tubo it makaywang beses.
Insigidang gindaea ro biktima sa Aklan Provincial Hospital samtang ro suspek hay naaresto ag ginkulong sa lock-up cell it New Washington PNP.
Ginasugid nga una sa impluwensiya it aeak ro biktima kat matabu ro insidente.
Aminado si Romulo nga dati eon sanda nga may owa pagka-ilintindihan ni Armenio.
