KALIBO, Aklan — Patay ro sangka 56 anyos nga babaye matapos nga aksidenteng makuryente sa sangka live wire nga patibong kunta nanda kontra sa mga manakaw, agahon it Lunes, Pebrero 24 sa Brgy. Lawaan, New Washington.
Suno kay Ms. Jenny Tamayo, team leader it Municipal Disaster Risk Reduction and Management Office (MDRRMO)-New Washington nga pag-abot nanda sa lugar hay ginbo-oe eon it anang mister ro bangkay it anang misis nga owa eon ginpangaeanan halin sa pagkasab-it sa kurae ag gindaea sa sueod it andang baeay.
Sa pag-examine, owa eon naga-response ro biktima ag mabakod eon ro anang eawas .
Bangud kara, owa eon nanda raya gindaea sa ospital ag sa baylo hay ginderetso eon lang sa sangka funeral parlor.
Ginapatihan nga haeos sang oras eon ro nagtaliwan kat masapwan ro anang bangkay.
Nakitaan raya it mga paso sa anang uyahon ag alima.
Antes ro insidente hay ginapatihan nga nagpamintoe ro biktima ukon nagpangbo-oe it alimango agud nga ibaligya, apang aksidenteng nabuytan ro live wire rason nga madasig nga nagkarang sa anang eawas ro mabaskog nga boltahe it kuryente.
Ginasugid nga nangawa ro anang mister matapos nga haeos sang 40 minutos eon imaw nga nagatawag agud nga magpasueang it baesa sa anang misis halin sa anang duty bilang barangay tanod, apang owa raya nagasabat.
Bangud kara, nagdesisyon imaw nga magtabok sa suba ag dikara hay naabutan ro anang misis nga owa eon it kabuhi nga nakasab-eay sa andang kurae sa likod nga parte it andang baeay.
Aminado sigon ro mister nga nag-install sanda it live wire bilang patibong agud nga protektahan ro andang pangabuhian kontra sa mga tawo nga nagapinanakaw it andang gina-alagaan nga mga bangeos ag alimango kun sa siin gin-utang eamang nanda ro andang kapital.
Antes nga nagsueod sa duty hay ginpaandaman pa sigon nana ro anang misis nga i-unplug ro switch it andang ginbutang nga live wire, apang posibleng nalipat raya.
