Kalibo Aklan —— Gin-aprubahan it plenaryo sa ginpatigayon nga 42nd regular session it 18th Sangguniang Panlalawigan (SP) ro sangka ordinansa nga nakabaehag ro kapin sa P56 milyon pesos nga pondo nga gin-alokar sa pakikipagsukoe it probinsya it Aklan sa 2019 coronavirus disease (COVID-19) pandemic.
Suno kay Aklan Vice Governor Atty. Reynaldo “Boy” Quimpo nga ro nasambitang kantidad hay halin sa anda nga nausoy nga savings ukon uwa nagamit nga kwarta halin ko dag-on 2018 hasta it 2019.
Ginpaathag nga ro P20 milyon pesos hay igata-o sa 17 ka mga munisipalidad sa Aklan kon sa siin tig-P1 milyon pesos ro kada lokal nga gobyerno ag ro P3 milyon pesos hay reserved anay ag ita-o sa ginakueang pa nga munisipyo.
Samtang, ro P36 milyon pesos hay igataeana sa mga indibidwal nga apektado man it krisis kapin eon sa mga uwa nakabaton it cash assistance sa idaeom it Social Amelioration Program (SAP), Pantawid Pamilyang Pilipino Program (4p’s) beneficiary ag ro mga empleyadong inde eon makabaton it ayuda halin sa DOLE bangud sa kakueangan it pondo.
Apang, uwa pa sigon it direktang klaro kaangot sa programa maski nga may suhestyon eon nga i-alokar ro pondo sa iba pang ahensya it gobyerno kaparehas it Department of Agriculture (DA), Department of Trade and Industry (DTI) ag Department of Labor and Employment (DOLE).
Pwede man suno kana nga magamit ro nasambitang haega sa mga stranded nga Aklanon sa sueod ag guwa it probinsya nga naabutan it Enhanced Community Quarantine.
Tuyo sigon it gobyerno probinsyal nga maayudahan ro tanan nga mga pumueoyo sandig man sa andang kaugalingon nga tikang sa tunga it krisis nga ginapangatubang it bilog nga probinsya it Aklan.
