KALIBO, Aklan — Patay eon kat masapwan ro sangka 58 anyos nga eaeaki nga ginapatihan nga inatake it anang baeatian samtang nagapungko sa andang sala sa sueod it andang baeay sa Spanish Road, Brgy. New Buswang Kalibo.
Bandang alas-8:30 kaina it agahon kat makit-an ro biktimang si Ruben Ortega, miyembro it Lupong Tagapamayapa sa nasambit nga lugar nga owa eon nagahueag ag may mga suka sa anang kilid .
Ginasugid pa nga mag-eowas nga owa naka-lock ro andang gate ag main door hay naga-andar man ro anang telebisyon.
Matsa nagapahaum eon man raya nga magkatueog bangud nga may nakahathat eon nga banig sa saeog.
Sa interview it Bombo Radyo, ginpahayag ni Generosa Flores, kaeapit-baeay it biktima nga ginsugo imaw it anang mister nga tan-awon ro biktima sa andang baeay bangud nga owa pa raya nagabukas it anang baraka .
Suno kana nga kahapon hay nagreklamo ro biktima nga maeain ro anang pamatyag rason nga nag-inom it paracetamol nga bueong .
Nasayuran nga naga-isaeahanon eamang nga naga-istar si Ortega sa anang baeay bangud nga kaeabanan sa anang pamilya hay idtu nagatinir sa Manila ag banwa it Libacao.
Nagapadayun pa ro imbestigasyon it Kalibo Police Station partikular ro pagtumod kon may foul play sa insidente.
