KALIBO, Aklan—Patay ro sangka 58-anyos nga ginang matapos nga masunggaban it kapareho karang motorista ro anang ginasakyan nga motorsiklo sa national higway nga sakop it Brgy. Caano, Kalibo.
Base sa report, nag-angkon it fatal nga lastro sa ueo ro biktimang si Andrea Tibobos, residente it Brgy. Mabilo, Kalibo nga nagresulta it anang hinali nga kamatayon.
Samtang, nakaangkon man it lastro sa eawas ro unga it biktima nga si Fredan Tibobos, 32-anyos nga imaw ro nagamaneho it motorsiklo.
Nasayuran nga magapaadto kunta sa banwa it Kalibo ro mag-ina apang pag-abot sa nasambitang lugar hay aksidenteng sumunggab kanda ro motorsiklong ginamaneho ni Federico Ricafort, 65-anyos, residente it Crossing Buswang, Kalibo.
Matapos ro insidente hay insigida man nga gindaea sa Aklan Provincial Hospital ro mga biktima kung sa siin gindeklarang patay it nagtatap nga doctor ro nasambit nga ginang.
Kaangot kara, nakaangkon eon man it settlement ro magtimbang nga parte matapos sandang magkasugot nga pagabayaran ni Ricafort ro 50 porsyento it mga gaeastuson medikal ag pagpaeubong sa biktima.
