KALIBO, Aklan–Pag atake it high blood ro ginaturo makarun nga rason it pagkamatay it sangka 59 anyos nga ginang ag isaeang ka street sweeper nga nasapwan eun lang nga owa eun it kabuhi sa sueod it anang payag sa Rizal Street, Brgy. Poblacion, Makato.
Suno kay Salita Mamerto, kaeapit baeay it namatay nga biktima nga ko huwebes nga adlaw hay nagpangayo pa it kwarta sa anang kaeapit baeay ro biktima agud nga maibakae it anang bueong.
Hasta nga ko adlaw it biyernes hay owa eun sigon nanda nakit-an pa nga nagguwa ro biktima hasta nga ko adlaw it Sabado hay nakahugom sanda it mabaho nga hugom.
Kahapon eamang sigon kat nasapwan ro nagaka-agnas nga bangkay it biktima samtang naga-eubog sa katre ag nagapamutos it haboe.
Nasayuran nga naga-isaeahanon sa anang panimaeay ro biktima.
Sa pihak nga parte, ginpahayag man PSSgt. James Padasas it Makato PNP nga sandig sa kagustuhan it pamilya it biktima hay gindaea nanda ro bangkay kara sa sangka punerarya ag ginpaidaeum sa post mortem examination.
Samtang nagpadumdom man si PSSgt. Padasas sa publiko nga kung mahimo hay likawan nga mag-isaeahanon sa sueod it sangka panimaeay agud may mapangayuan it bulig sa oras it emerhensiya.
