KALIBO, Aklan—An-om ka mga miyembro it Firefighting unit it Civil Avaition Authority of the Philippines ukon CAAP-Aklan nga nakabase sa Kalibo International Airport ro nagpositibo sa Coronavirus Disease 2019 ukon COVID-19.
Suno kay CAAP-Aklan Manager Engr. Eusebio Monserate Jr. nga unang nakitaan it sintomas it COVID-19 ro sangka fire fighter it nasambitan nga paeuparan rason nga ginpaidaeum sa RT-PCR test kung sa siin nagpositibo ro resulta kara.
Ro limang iba pa hay puro tanan nakaangkon it close contact sa nauna nga pasyente ag sa makarun hay puro tanan naka-quarantine.
Sa makarun hay padayun pa ro ginahimo nga contact tracing sa mga nakasalamuha it mga nasambitan nga pasyente.
Sa pihak kara, ginpasiguro ni Engr. Monserate nga magapadayun ro operasyon it nasambitan nga paeuparan.
Ginlaygayan man kara publiko nga indi magkahadlok bangud ro mga nagpositibong empleyado it paeuparan hay bukon it kaparte it andang frontline workers.
Gin-abisuhan man kara ro tanan nga padayun nga magsunod sa ginapatuman nga health protocol agud nga malikawan ro COVID-19 virus.
