KALIBO, Aklan — An-um nga katawo nga puro mga magpamilya ro una eon sa mayad nga kahimtangan matapos nga maeowas sa kumueob nga baroto sa kaeawran nga sakop it Brgy. Gibon, Nabas, Aklan.
Sa interview it Bombo Radyo, ginpahayag ni Seaman Second Class (SN2) Elmer Asain it Philippine Coast Guard (PCG)-Aklan nga kumueob ro fishing banca nga “Demar” sa nasambit nga lugar samtang nga naga-eayag halin sa Sitio Bolabog, Brgy. Balabag sa isla it Boracay ag paagto kunta it Pio Duran, Albay agud nga magbakasyon kat gulpi nga ginhampak it mga mabahoe nga humbak ag mabaskog nga hangin nga naging rason it pagsueod it tubi hasta nga eubusan nga kumueob.
Insigidang rumesponde ro search and rescue unit it Coast Guard Sub-Station Boracay, matapos makabaton it report halin sa sangka Chana Mea Bartolome, hipag it skipper ukon kapitan it baroto nga si Demar Hernandez.
Suno kay SN2 Asain, pag-abot sa lugar, insigidang ginsaylo ro mga naka-eowas sa inflatable boat it PCG ag gindaea sa Caticlan jetty port samtang ro nag-eugdang nga fishing boat hay ginbira it sangka speed boat paagto sa Brgy. Caticlan.
Owa sigon it naninahan sa mga survivors nga puro mga residente it Brgy. Balabag, Boracay kaibahan ro daywang unga nga may edad nga siyam ag an-um nga dag-on.
