KALIBO, Aklan—Naninahan ro pitong katawo matapos nga ro andang ginasakyan nga pampasaherong van hay bumaliktad sa pakurbada nga highway nga sakop it Sitio Himbis, Barangay Lalab, Batan, agahon it Lunes, Disyembre 25.
Base sa report, posibleng naduea-an it kontrol sa manibela ro driver it crosswind nga van nga kulay puti rason nga bumunggo sa poste sa kilid it karsada.
Suno kay Wilma Flogio, nakasaksi sa aksidente nga medyu may kadasigon ro pagpadaeagan it saeakyan, kun sa siin nga ginsita pa sigon raya it sambilog sa anang mga sakay.
Naninahan ro driver ag ro an-um nga mga pasahero kara nga puro magpamilya nga nagpamalibad eon nga magpamitlang it andang mga pangaean.
Ginasugid nga halin sa Bacolod City ro magpamilya ag nag-arkila it nasambit nga van pag-abot sa siyudad it Iloilo nga tuyo kunta nga maga-agto sa Barangay Caticlan, Malay agud nga magbakasyon sa isla it Boracay.
Insigidang gindaea ro mga biktima sa ospital it mga rumespondeng tawuhan it MDRRMO-Batan para sa nagakaigo nga medikasyon.
Sa mayad nga swerte sigon ag bukon it grabe ro naagum nga lastro it mga biktima sa nagkaeain-eain nga parte it andang eawas.
Aminado ro mga residente nga maabu eon nga aksidente ro natabu sa lugar nga ginakabig nga accident prone area bangud nga zigzag ro karsada.