KALIBO, Aklan—Nakataeanang pasakaan it patong-patong nga kaso ro 6 nga turista matapos nga nagpakita it peke sigon nga swab test results it COVID-19 agud nga makasueod sa sa isla it Boracay.
Suno kay P/Staff Sgt. Jane Vega, tagapaghambae it Aklan Police Provincial Office pagkatapos makompleto ro 14-diyas nga quarantine period hay pagapasakaan pa ro mga raya it kaso bangud sa falsification of documents ag pag-eabag sa Republic Act 11332 ukon Mandatory Reporting of Notifiable Diseases and Health Events of Public Health Concern Act ag RA 11469 ukon ro Bayanihan to Heal as One Act.
Sa oras sigon nga sambilog pa kanda ro magpositibo sa makamaeatay nga sakit, dugang nga kaso ro igapasaka kanda.
Gusto sigon ni P/Col. Esmeraldo Osia, Jr., Aklan police provincial director nga kabay nga magasirbing leksyon ro kaso sa mga turista nga masyadong ginbalewala ro seguridad nga andang ginapatuman.
Gindugang pa ni Vega nga nagapabilin sa quarantine facility sa Aklan Training Center sa Barangay Old Buswang Kalibo ro mga turista nga ginaeakipan it ap-at nga babaye ag daywang eaeaki nga puro taga-Metro Manila.
Boluntaryo nga nagsurender ro mga raya sa pulisya matapos arestuhon sa hotel nga gina-istaran.
Matapos makitaan it discrepancy sa serial number, nakipag-angot eagi ro Malay Police Station sa Mandaluyong City Police para i-check ro Safeguard DNA Diagnostic Center, kun sa siin nagpaidaeum sigon sa swab testing ro mga turista.
Dikara nakumpirma nga sambilog eamang sa 6 nga RT-PCR test results nga andang ginpa-usisa ro authentic.
Ro ibang test results hay mga photocopies ag ginretoke.
Ginpasiguro man kara nga padayun nga igapatuman ro minimum health protocols para sa kaeowasan it mga turista ag residente sa probinsiya.
