KALIBO, Aklan—Medyu owa it naging kamadlaan ro pilang mga turistang paagto sa isla it Boracay matapos nga 6 eon man ro naaresto kabi-i bangud sa paggamit it pekeng RT-PCR test.
Suno kay Provincial Administrator Atty. Selwyn Ibarreta ro mga turista hay nakasueod eon sa Boracay antes nga natukiban nga peke ro andang swab test results.
Rekisito ro negatibong RT-PCR test antes nga pasugtan nga makasueod sa Boracay ro mga turista.
Mag-eowas sa ginabuytan nga probationary QR code nga andang gingamit para makasakay sa eroplano, natukiban nga owa man sanda it booking confirmation sa hotel nga paga-istaran.
Insigidang gin-usoy ro mga turista matapos nga mabaton it verification team halin sa sangka molecular laboratory sa Quezon City nga peke ro andang RT-PCR test results.
Nakita ro mga raya sa sangka hotel sa Brgy. Manocmanoc bilang mga walk-in guests.
Bangud sa sunod-sunod nga pagka-dakop sa mga turistang may daeang pekeng dokumento, ginpahayag ni Atty. Ibaretta nga indi eon magatau ro provincial government it QR code samtang owa pa it kumpirmasyon halin sa molecular laboratory.
Presenteng naka-isolate ro 6 nga mga turista sa sangka hotel sa banwa it Kalibo.
