KALIBO, Aklan–Sigidas makaron ro ginapatigayun nga hot pursuit operation it Malinao Municipal Police Station kontra sa suspek nga nag-eabo patay sa sangka eaeaki ko Mayo 16 sa bahin it Brgy. Tambuan, Malinao.
Suno kay Police Lieutenant Zacarias Rose, Chief of Police it Malinao Municipal Police Station nga natabo ro pagpang-eabo sa sueod mismo it quarry site it sangka construction firm nga ginatrabahuhan it biktima nga si Monsirito Nobleza, 61-anyos, residente it Dongon East, Numancia.
Base sa inisyal nga imbestigasyon it Malinao PNP, samtang nagapanaog it krudo nga ginagamit sa andang equipment ro biktima kaibahan ro ibang katrabaho hay gulpi eamang nag-abot ro suspek nga si Allan Sablayan, 36-anyos, tumandok it Catbalogan, Samar apang presenteng naga-istar sa Brgy. Kinalangay Viejo ag armado it sanduko.
Kung siin, insigida kara nga gin-atake ro biktima nga nag-angkon it nagkaeain-eain nga lastro sa eawas.
Matapos ro insidente hay madasig nga nagpaeagiw si Sablayan sakay it sangka motorsiklo.
Gintinguhaan pa nga madaea sa Aklan Provincial Hospital ro biktima apang insigida man nga binawian it hueam nga kabuhi.
Posible sigon nga ro dating bagina sa tunga it magtimbang nga parte ro motibo sa krimen.
Sa makaron hay padayun pang ginatugis it mga otoridad ro nasambit nga suspek.
