KALIBO, Aklan—Kapin sa 63 nga mga kiosko it lotto ag iba pang gaming outlets sa bilog nga probinsiya it Aklan ro ginpasarado ko Sabado matapos nga ginmandu ni Pangueong Rodrigo Duterte ro pagsuspinde sa gaming operations nga ginapadaeagan it Philippine Charity Sweepstakes Office (PCSO).
Suno kay P/Corporal Jane Vega, tagapaghambae it Aklan Police Provincial Office (APPO) nga naglibot ro mga kapulisan sa nagkaeain-eain nga lotto outlets agud nga hinyuon ro mga raya nga punduhon anay ro andang operasyon bangud sa ginpaguwa nga mandu it Pangueo.
Madumduman nga gintaw-an it pangueo it 24 oras ro mga otoridad umpisa ko Hulyo 27 nga punduhon ro gaming activities nga gina-operate, may lisensiya ag may prangkisa it PCSO tuga it gina-alegar nga maeapnagon nga corruption sa ahensiya.
Raya hay gina-eakipan it mga outlets it lotto, small town lottery (STL) ag keno.
Ginpahayag dugang nga pila sa mga nagapanag-iya it outlets hay boluntaryo nga nagsarado it andang mga shops.
Pila sa mga kapulisan hay nagpaskil it closure order sa pilang lotto outlets nga andang gin-inspeksyon.
