KALIBO, Aklan—Nag-abot sa 80 t0 90 percent ukon kabilugan nga 637 nga mga kandidato ro nakasumite it Statement of Contributions and Expenditures ukon SOCE hasta sa pagtapos it deadline kara ko Nobyembre 29 sa banwa it Kalibo.
Raya ro ginkumpirma ni Atty. Christian Itulid, Comelec election officer IV it Comelec Kalibo.
Suno kana nga indi eon sanda magabaton it late filing it SOCE bangud nga obligado sanda nga ipasa ro report sa sueod it pitong adlaw sa provincial ag central office it Commission on Elections ukon Comelec.
Ro sin-o man suno kana nga kandidato sa nagtaliwan nga October 30 nga Barangay and Sanggunian Kabataan Elections nga mapas-eawan nga makasumite it andang SOCE hay iga-notify it poll body.
Ro central office suno kana ro naga-evaluate sa dokumento it mga nag-comply kon nakasunod sanda sa gintaeana nga maximum spending limit nga limang piso kada rehistradong botante kamana man ro pagpapanaog it penalidad sa mga napas-eawan nga maka-file kara.
Ginpaathag ni Atty. Itulid nga ro submission it SOCE hay requirement sandig sa Omnibus Election Code of the Philippines agud nga matumod kon nakasunod sa gintaeana nga dapat gastuson it sangka kandidato.
Ro mapas-eawan nga maka-file it required statements ukon reports angot sa electoral contributions and expenditures hay pagapapanaugan it penalidad ag pagabawaean nga makapungko sa anuman nga public positions it Comelec.
Maskin sigon ro mga nag-atras it andang kandidatura ko eleksyon hay kinahangean nga magpasa it SOCE.
Samtang, sa pagtapos it election period, ginpahayag ni Atty. Itulid nga bukon eon it aplikable ro ginpatuman nga mga elections rules kapareho it gun ban ag iba pa.