KALIBO, Aklan—Ginkasubo it Municipal Health Office (MHO)-Libacao ro pagkamatay it sambilog sa andang kasimanwa nga nauna eon nga nagpositibo sa Coronavirus Disease 2019 ukon COVID-19.
Suno kay Dr. Aldrin Fernandez it MHO-Libacao, ro pasyente hay sangka 65-anyos nga babaye nga nakaangkon it direct contact sa anang asawa nga 65-anyos nga eaeaking nauna eon man nga nagpositibo sa deadly virus.
Ginasugid nga haeos limang dag-on eon nga nagapaidaeom sa dialysis ro pasyente bangud sa ginabatyag kara nga sakit sa bato ukon kidney ag pag-angkon it iba pang baeatian kapareho it diabetes, sakit sa puso kamana man nga nahawaan it COVID-19.
Ginasugid nga pasado alas-3:15 ko aga-aga it Miyerkules binawian it kabuhi ro pasyente sa Aklan Provincial Hospital.
Ro patay nga eawas it nasambitang pasyente hay gindaea eon sa syudad it Iloilo para i-cremate.
Sa makaron hay naga-abot eon sa waeo ro kabilugan nga kaso it nasambit nga sakit sa banwa it Libacao kung siin lima eon kara ro naka-recover samtang daywa ro presenteng una sa naka-facility quarantined ag sambilog ro namatay.
