KALIBO, Aklan – – – Bangkay eon kat makit-an ro sangka 65-anyos nga ginang matapos nga inanod it baha sa kasagsagan it mabaskog nga uean tuga it nagtaliwang bagyong Agaton sa Sitio Belen, Barangay Rosal, Libacao, Aklan.
Gin kilaea ro biktimang si Lolita Verano ag residente it nasambitang lugar.
Base sa imbestigasyon itLibacao Police Station, pauli eon konta ro biktima kaibahan ro anang magueang ag gumankon kat mapan-uhan nga amat-amat eon ro pagtaas it tubi sa suba.
Agud makauli, naghimo sigon sanda it tulay nga kawayan kun siin madinaeagon man nga naka-eagpas ro daywa apang, kat imaw ro magatawid hay nabali sigon ro kawayan ag nahueog ro biktima ag insigida nga inanod it naga ragasang tubi.
Kahapon it hapon hay narekober ro anang bangkay it mga tawuhan it Municipal Disaster Risk Reduction and Management Office.
