KALIBO, Aklan—Ginpasiguro ni Aklan 2nd district congressman Teodorico “Ted” Haresco nga makaangkon sa gihapon it boses ro gobyerno probinsyal ag lokal nga gobyerno it Malay sa igatukod nga Boracay Island Development Authority ukon BIDA.
Suno kana nga magiging kaparte sanda it igatukod nga national authority, kun sa siin, ro provincial government ro magiging co-chairman ag ro LGU Malay hay sambilog sa mga miyembro kaibahan ro iba pang pribadong sektor.
Makabig sigon nga mayad nga balita ro pahayag ni Pangueong Rodrigo Duterte agud nga malikawan ro pagtueur-an ag pagbaeasuean kon may nagadumaea sa Boracay eabi eon ro implementasyon it mga rehabilitation projects ag iba pang mga aktibidades.
Sa pangkabilugan, ro BIDA suno kana hay makabulig it mabahoe eabi eon kon may mga proyekto nga nagakinahangean it mabahoe nga pondo.
Nasayuran nga ro pondo it national authority hay iga-eakip eon sa General Appropriations Act nga mabahoe nga suporta para sa development it isla.
Kumpara sa LGU nga limitado eamang ro resources nga kaeabanan nga nagasalig sa kita sa turismo.
Sa oras nga maging laye, ro BIDA ro magadumaea sa anuman nga naumpisahan nga mga paglimpyo ag rehabilitasyon it Boracay.
Sa makaron hay haeos 80 porsiyento eon nga tapos ro rehabilitation works sa isla, kun sa siin , ginaeauman nga matapos ro phase II it road project sa buean it Setyembre nga nadelay bangud sa covid 19 pandemic.
Samtang, ro mga proyekto man it Tourism Infrastructure and Enterprise Zone Authority (TIEZA) eabi eon sa drainage system hay posibleng makompleto sa Disyembre.
