KALIBO, Aklan—Plantsado eon ro deployment plan it Municipal Disaster Risk Reduction and Management Office (MDRRMO)-Kalibo sa nagahilapit nga selebrasyon it Semana Santa.
Suno kay Mr. Terence Jun Toriano it MDRRMO-Kalibo nga nagpatigayun eon sanda it pueong ko adlaw it Lunes kaibahan ro mga lider it simbahan kun sa siin naistoryahan eon nanda ro mga tikang nga pagahimuon.
Suno kana, may iga-deploy sanda nga tig daywang team sa St. John the Baptist Cathedral ag St. Jude Thaddeus Church.
Ro mga natungdan nga MDRRMO officer suno kana hay magaserbing medics ag compliance officer kun sa siin sanda ro maga-remind sa mga tumueo-o nga magsunod sa health and safety protocols.
Raya hay para masiguro nga maging eowas sa paeag it deadly virus ro mga tawong nagapamaeandong sa tyempo it kwaresma.
Madumduman nga temporaryong ginsarado anay ro mga kilaeang pilgrimage sites sa probinsiya it Aklan bangud sa paeag it Coronavirus Disease 2019 ukon COVID-19.
Kaibahan eon kara ro masami nga ginadayo nga Manduyog Hill kun sa siin makit-an ro life-sized Station of the Cross ag Tigayon Hill.
Raya hay agud nga maprotektahan ro mga pilgrims ag mabaeabagan ro pag-abu it kaso it COVID-19 infection.
