KALIBO, Aklan—Padayun nga gina-obserbahan sa intensive care unit ukon ICU it sangka pribadong ospital ro sangka 69 anyos nga lolo matapos nga ginbunaean it tubo it sangka rider nga anang gina-alegar nga nakagitgitan sa Brgy. Bacan, Banga, hapon it domingo, Setyembre 8.
Suno kay Michael Ingalla, unga it biktimang si Emmanuel Ingalla, parehong residente it nasambit nga lugar nga desidido sanda nga magpasaka it nagakaigo nga frustrated homicide kontra sa suspek nga si Joey Bolina alyas Jojo Ricaforte, 43 anyos ag tumandok it Brgy. Poblacion sa nasambit nga banwa matapos nga ginbunaean it tubo ro tangkugo it andang ama.
Sa imbestigasyon, naglikaw ro biktima sa malubak nga parte it karsada rason nga sangkiri raya nga nabungguan it suspek.
Ginasugid nga nakaangkon it mainitan nga diskusyon ro daywa hasta nga nabayo ni Ricaforte si Ingalla.
Bilang self-defense hay nagbo-oe man it tubo ro biktima halin sa anang saeakyan, apang inagaw raya it suspek ag ginbunae ro magueang sa anang tangkugo rason nga nakaangkon it lastro.
Naaresto it rumespondeng katapo it Banga Municipal Police Station si Ricaforte ag presenteng nakakulong sa custodial facility it Banga PNP.
Parehong nagapa-agto sa direksyon it Brgy. Poblacion ro daywang motorista kat matabu ro insidente.
Dugang pa nga una sa impluwensiya it aeak ro suspek nga gina-alegar nga halin sa outing sa banwa it Madalag.
Si Ricaforte hay ginasugid nga may maabu eon man nga ginapangatubang nga reklamo sa andang barangay, apang puro na-areglo.
Nakataeana man nga iga-review ro CCTV footage sa lugar bilang kaparte it nagapadayun nga imbestigasyon it kapulisan sa natabu nga road rage sa nasambit nga lugar.
