KALIBO,Aklan– Eowas ro mga Pinoy sa nasyon it Tonga kasunod it nagtuhaw nga 7.4 magnitude nga linog ko nagtaliwan nga adlaw.
Suno kay Bombo International Correspondent Merelyn Colacion Tundag nga uwa it masyadong epekto ro nasambit nga linog.
Nabatyagan sigon nanda ro paghueag it andang mga kagamitan apang bukon it kaparehas ko mga nagtaliwan nga linog nga nagakahueog ro andang mga display nga kagamitan.
Suno pa kana, pasaeamat sigon sanda nga uwa it masyadong epekto ro nasambit nga linog ag uwa man it ginpaguwa nga tsunami warning.
Samtang, plano eon makaron it mag-asawang Tundag nga magauli it Pilipinas for good para iya eon man ienjoy kaibahan it andang mga himata ag kaabyanan ro andang nagadugang eon man nga edad.
Nasayuran nga kapin sa 10 anyos eon ro ulihi nga bakasyon ni Merelyn sa Pilipinas apang ro anang asawa nga si Doiny hay kapin sa 20 anyos eon nga uwa nakauli sa Pilipinas.
