Kalibo Aklan ——-Ninahan ro sangka pitong dag-on nga ongang eaeaki matapos nga sunggaban it motorsiklo ro tricycle kara nga ginasakyan kaibahan ro anang ina sa Brgy. Calangcang, Makato.
Base sa inisyal nga imbestigasyon it Makato PNP, ginpahayag ni P/Staff Sgt. Legaspi nga head on collision ro natabo sa daywang ka behikulo.
Una sa lugar ro tricycel nga ginamaneho ni Jodemar Taus it Brgy. Cabatanga sa nasambit nga banwa kat ginsunggaban it motorsiklo nga ginamaneho mat-a ni Jonathan Malabanan, sa legal nga edad ag residente it Brgy. Silakat Nonok, Lezo.
Bangud sa impact, nabasag ro saeaming it tricycle nga umigo sa ueo it onga nga ginkilaea kay Zian Zander Yacub.
Si Yacub hay insigida man nga gindaea sa Aklan Provincial Hospital kon sa siin imaw sa makaron naka-confine para sa anang nagakaigong pagbueong.
