KALIBO, Aklan—Arestado ro pito ka mga indibidwal matapos nga maaktuhan it Numancia PNP nga nagapatigayun it illegal nga pagbueang sa Brgy. Bubog, Numancia.
Nakilaea ro mga suspek nga sanday Arjay Adonay, 39-anyos, residente it Brgy. Laguinbanwa West; Clarise Delos Santos, 57-anyos it Brgy. Badio; Ronnie Delgado, 51-anyos it Brgy. Alibagon, Makato; Freddie Sauza, 55-anyos, Procolo Villanueva, 62-anyos, Rey Talabucon, 56-anyos ag Roger Talabucon, 35-anyos parehong residente it nasambit nga lugar.
Ginpahayag ni Police Lieutenant Moonyen De Joseph it Numancia Police Station nga mabuhay eon sanda nga nakabaton it impormasyon angot sa illegal nga aktibidad it mga suspek kun sa siin naging madinaeag-on ro andang ginpatigayun nga operasyon.
Narekober sa lugar ro limang ka mga manok ag kwarta nga nagabalor it P1,200 nga gingamit bilang taya.
Presenteng sa paghinakop eon it pulisya ro mga suspek ag posibleng magpangatubang kasong pag-eabag sa Presidential Decree 449 ukon Illegal Cockfighting.
Ro pyansa sigon kara hay indi magnaba sa P30,000 para sa temporaryong kahilwayan it mga nasambit nga suspek.
Angot kara, ginpasiguro man it opisyal nga padayun ro andang ginahimo nga monitoring ag operasyon kontra illegal nga sugae.
Samtang, nagpanindugan man ro sambilog sa mga suspek nga si Roger Talabucon nga owa imaw it kahilabtanan sa illegal nga hilimuon.
Suno kana, nag-adto eamang imaw sa baeay it anang igkampod ag nakipag-inuman.
Owa sigon kara ginaeauman nga magsakalay sa lugar ro mga miyembro it kapulisan rason nga nakaibahan imaw sa mga gin-aresto.
