KALIBO, Aklan—Pito ka mga indibidwal ro natigayon nga naaresto it Kalibo PNP bangud sa illegal nga sugae bandang alas-2:00 it hapon sa Purok 2 C. Laserna, St. Kalibo.
Ginkilaea ro mga raya nga sanday Shawie Sargueza, 26-anyos; Christopher Murallo, 44-anyos; Teresa Gregorio, 40-anyos; Nonito de Panay, 59-anyos; Rene Dela Cruz, 48-anyos; Joselito Segovia ag Joshua Villanueva, parehong sa legal nga edad ag tanan hay mga residente it nasambit nga lugar.
Una kara, nakabaton it impormasyon ro pulisya nga may nagasugae sa baeay ni Segovia rason nga insigidang nagpatigayon it operasyon ro mga otoridad ag naaktuhan ro mga raya nga nagasugae it posoydos.
Narekober sa andang posisyon ag kontrol ro sangka set it baraha ag P365 pesos nga kwarta nga ginamit bilang taya.
Samtang, sambilog kanda hay nagsaka sa second floor it baeay ag sa kahadlok nga madakpan it mga pulis hay nag-eompat sa bintana apang uwa man gihapon imaw nakapaeagyo sa nagaaresto nga otoridad.
Ro nasambit nga mga indibidwal hay magapangatubang sa kasong pag-eabag sa Presidential Decree 1602 ukon mas kilaea sa tawag nga Anti-Illegal Gambling Law.
