KALIBO, Aklan—Kapin sa 70 ka mga ream it peke nga sigarilyo ro na-recover it mga kapulisan kasunod it ginkasa nga entrupment operation sa porsyon it C. Quimpo Street, Brgy. Poblacion, Kalibo.
Naaktuhan it mga otoridad ro suspek nga nakilaea kay Roberto Agustin, 39-anyos, residente it Brgy. Poblacion, New Washington nga nagabaligya it mga pekeng mighty products ukon sigarilyo sa nasambitang lugar.
Base sa report, kaibahan it pulisya sa andang entrupment operation ro sangka representante it JT International Philippines Inc.
Sa pag-eksamin sa mga nakumpiskang sigarilyo naguwa nga peke ro mga raya.
Sa makarun hay nakakulong eon sa Kalibo Police Station si Agustin ag posibleng magpangatubang it kasong pag-eabag sa Republic Act 8293 ukon Intellectual Property Code of the Philippines.
