KALIBO, Aklan — Ginpakigbahin it sangka 74-anyos nga lola halin sa banwa it Numancia sa Bombo Radyo Kalibo ro anang eksperyensiya sa pakikipag-amigo kara sa sangka dewende.
Suno kay lola Bhelle, 23-anyos pa eamang imaw kat nakakita it duwende nga puti kon siin nakasuksok sigon raya it kaeo nga mataeawis ag nagahampang it manyika.
Halin sigon kat nagpakita kanda ro duwende hay naging maugan ro andang pagpangabuhi ag uwa sanda nawawad-an it kwarta.
Ro andang mga kinahang-eanon sa pang-adlaw adlaw hay madali eamang nanda usuyon kapin eon kon nakikipag-istorya sanda sa duwende maskin nga uwa eon nanda raya nakit-an ko ulihi.
Nagapati sigon imaw nga mabuot ag mabinuligon ro nag-istar nga tamawo sa andang panimaeay rason nga uwa sanda it maskin anong kahadlok nga nabatyagan sa baylo, naila pa sanda bangud nga raya sigon ro nagdaea kanda it ginakabig nga swerte sa pagpangabuhi.
Ginpahayag dugang nga bukon eamang it imaw ro nakakita it kapareho nga tamawo kundi maging ro anang tatay rason nga ginpabay-an nanda raya nga mag-istar sa andang panimaeay kaibahan nanda.
