KALIBO, Aklan—Madinaeag-on eon nga nalimpyuhan ro 8.5 nga ektarya it wetland sa Brgy. Manoc-manoc sa isla it Boracay.
Raya hay matapos nga natigayon eon nga mapahalin sa lugar ro mga iligal nga naga-istar kamana man ro andang mga istraktura.
Suno sa Department of Environment and Natural Resources (DENR) , ro nasambit nga lugar hay nauna eon nga ginakabig nga “dead forest” nga gina-okupahan it 31 nga pamilya nga kaeakip sa tumandok tribe.
Ginpahayag ni DENR Director Natividad Bernardino ag nagaserbi man nga general manager it Boracay Inter-Agency Rehabilitation Management Group (BIARMG), ro pagbawi sa Wetland No. 6 hay sandig sa pagsunod sa Executive Order 53 nga ginhimo it Boracay Inter-Agency Task Force (BIATF) para sa rehabilitasyon it isla.
Ro 31 nga pamilya hay benepisyaryo it certificates of land ownership awards nga gintau it Department of Agrarian Reform ko marso.
Raya hay bilang kaparte it promisa ni pangueong Rodrigo duterte nga itau ro eugta sa isla sa mga katutubo ag mga tumandok it Boracay.
Nauna eon nga ginpahayag ni DENR Secretary ag BIATF Chairman Roy Cimatu nga sa 9 nga mga wetlands sa isla nga nagakinahangean it rehabilitasyon, lima sa mga raya hay gin-adopt it mga pribadong kompaniya sa sueod it tatlo hasta limang dag-on bilang kaparte it andang corporate social responsibility programs.
